Народны літаратурна-краязнаўчы музей Якуба Коласа ў Пінкавічах запрасіў гасцей на вялікае свята. Ужо стала добрай традыцыяй адзначаць тут раённыя “Каласавіны”. Так мілагучна называюцца мерапрыемствы, якія ладзяцца 3 лістапада, у дзень нараджэння класіка беларускай літаратуры.
Святочная імпрэза ў Пінкавічах атрымалася асабліва ўзнёслай, бо была прысвечана 140-годдзю з дня нараджэння Якуба Коласа. З традыцыйнымі вершаванкамі-запрашанкамі сустракалі гасцей удзельнікі аб’яднання юных экскурсаводаў “ГіД” (гаваркія і дапытлівыя): “Свежыя навіны – у нас “Каласавіны”, спяшайцеся хутчэй на свята ў музей!”.
Ствараў добры настрой народны інструментальны ансамбль выкладчыкаў Пінкавіцкай дзяржаўнай школы мастацтваў “Мяцеліца”, які выконваў фальклорныя мелодыі ў сучаснай апрацоўцы. Педагогі школы пранікнёна выканалі песню на словы Якуба Коласа “Мой родны кут”, якая і адкрыла насычаную праграму.
Незабыўныя эмоцыі падаравалі прысутным педагог дадатковай адукацыі Жыдчанскай сярэдняй школы Зоя Кондрацюк са сваімі калегамі: яны інсцэніравалі вершаванае апавяданне Якуба Коласа “За дождж”. І камедыйны сюжэт, і яркія вобразы прыйшліся даспадобы гледачам. А як прыгожа гучала сакавітая беларуская мова падчас тэатралізаванай пастаноўкі ўрыўка з паэмы “Новая зямля”! Ролі бліскуча выканалі вучні Стытычаўскай сярэдняй школы, якія займаюцца пад кіраўніцтвам педагога дадатковай адукацыі Марыі Кліменка.
Прыемна адзначыць, што моладзь прымала актыўны ўдзел у “Каласавінах”. Так, здзівіў выкананнем рэп-кампазіцыі на беларускай мове студэнт Пінскага дзяржаўнага каледжа мастацтваў Іван Дарашэнка. Сваю песню юнак прысвяціў сталіцы Палесся. Дзяўчаты з вакальнага калектыва Пінкавіцкай сярэдняй школы імя Якуба Коласа “Дамісолькі” пад апладысменты выканалі песню пра беларускую мову. Упрыгожваннем канцэрта стаў танцавальны нумар “Вышыванка”, які падрыхтавалі ўдзельніцы калектыва “Сланечнікі” Цэнтра творчасці дзяцей і моладзі Пінскага раёна.
Сюрпрыз для літаратурна-краязнаўчага музея падрыхтавала таленавітая і шматгранная асоба – бібліятэкар Пінкавіцкай сельскай бібліятэкі Святлана Мажароўская. Яна вышыла вялікі партрэт Якуба Коласа, які здзіўляе сваёй рэалістычнасцю. Як адзначыла метадыст Цэнтра творчасці дзяцей і моладзі Пінскага раёна і гаспадыня музея ў Пінкавічах Жанна Верыч, гэты шэдэўр зойме пачэснае месца ў экспазіцыі памяці Песняра.
З захапленнем госці свята паслухалі выступленне беларускага літаратураведа, кандыдата філалагічных навук, дацэнта, нашай зямлячкі Вольгі Козіч. Цікава, што лініі лёсу звязваюць яе з Якубам Коласам – дзед Вольгі Ільінічны Мікіта Козіч, жыхар вёскі Пінкавічы, быў вучнем будучага народнага паэта. У музеі нават захоўваюцца яго ўспаміны пра “вучыцеля Міцкевіча”, які быў добрым педагогам, а яшчэ дапамагаў сялянам у іх барацьбе з панам Скірмунтам за зямлю і балоты, за права лавіць рыбу.
Падарункам усім прысутным сталі песні і вершы ў выкананні членаў клуба літаратараў Піншчыны “Пінчукі” Віктара Мяцельскага, Анатоля Козіча, Галіны Лазіцкай, Людмілы Шклёды, Уладзіміра Вароніна і іншых.
Метадыст Цэнтра творчасці дзяцей і моладзі Пінскага раёна Жанна ВЕРЫЧ:
“У гэтым годзе мы адзначаем 140-годдзе Якуба Коласа, а музею ў Пінкавічах налічваецца ўжо 32 гады. Прыемна, што наша ўстанова запатрабавана ў насельніцтва. Так, за мінулы месяц музей наведалі больш за 600 чалавек. Наша аўдыторыя – не толькі школьнікі, гэта навучэнцы каледжаў і студэнты, моладзь, дарослыя. Улетку мы праводзілі індывідуальныя экскурсіі для турыстаў з Мінску, Брэста, Гомеля і другіх гарадоў. “Каласавіны” – наша брэндавае свята. Уся краіна святкуе дзень нараджэння Якуба Коласа як класіка беларускай літаратуры, а на Палессі да гэтага часу помняць яго як настаўніка Пінкавіцкага народнага вучылішча, які працаваў тут з верасня 1904 года па студзень 1906 года. Ва ўспамінах старажылаў вёскі, якія перадаюцца з пакалення ў пакаленне, малады настаўнік Канстанцін Міхайлавіч Міцкевіч паўстае як добры, душэўны, просты чалавек. Вось так жывуць успаміны над берагам Піны!”.
Наталля МІЛЕЎСКАЯ
Фота аўтара